Nýlega var ljónið Loonkiito drepið í Keníu. Þetta er talið hafa verið eitt elsta ljón heims en það fæddist 2004 og var því 19 ára. Ljón lifa að öllu jöfnu ekki lengur en í 14 ár.

Sky News segir að Loonkiito hafi búið á verndarsvæði sem er 1,3 milljónir ekra að stærð og nær yfir fjóra þjóðgarða.

Dýraverndunarsamtökin Lion Guardians tilkynntu í síðustu viku um drápið á samfélagsmiðlum. Segja samtökin að Loonkiito hafi verið langsoltinn vegna þurrka á svæðinu og því hafi hann lagst á búfénað.

Því miður hafi hann stokkið inn í girðingu, þar sem búfénaður var, um miðja nótt og hafi verið staðinn að verki og hafi verið drepinn. Þetta hafi verið erfið staða, bæði fyrir ljónið og fólkið.