Maður hefur verið handtekinn í Þýskalandi grunaður um að vera valdur að dauða 52 ára gamals manns sem drakk óafvitandi kampavín á veitingastað sem eiturlyfinu MDMA hafði verið blandað út í.

Atburðurinn átti sér stað í febrúar á síðasta ári í bænum Weiden í Bæjaralandi. Maðurinn var hluti af hóp átta kvenna og karla sem voru gestir á veitingastaðnum. Þau drukku öll kampavín úr sömu þriggja lítra flöskunni, sem MDMA hafði verið blandað út í, þau veiktust öll og þurftu að leggjast inn á sjúkrahús en 52 ára gamli maðurinn var sá eini þeirra sem lét lífið.

Rannsóknir á flöskunni leiddu í ljós að hún innihélt mikið magn MDMA, sem einnig er kallað alsæla (e. ecstasy).

Eftir að hafa drukkið kampavínið engdust sum í hópnum af kvölum og beinlínis öskruðu vegna sársauka.

Saksóknaraembættið í Weiden segir að sá grunaði sé 35 ára gamall karlmaður og pólskur ríkisborgari. Hann hafi flúið til Hollands þar sem hann hafi verið loks handsamaður í samvinnu við hollensk og pólsk yfirvöld.

Hann á yfir höfði sér ákæru fyrir eiturlyfjasölu, manndráp og að valda líkamstjóni.

Maðurinn er sagður hafa verið í samstarfi við glæpagengi og talinn hafa borið ábyrgð á að geyma eiturlyf sem komið hafði verið fyrir í flöskum og geymt í Hollandi. Saksóknaraembættið segir hann því bera ábyrgð ásamt öðrum á því að flöskurnar enduðu í höndum þriðja aðila.

Fjöldi flaskna sem innihéldu MDMA voru raktar til Hollands og höfðu margar þeirra verið seldar til aðila sem höfðu enga hugmynd um inninhaldið. Ein þeirra endaði á veitingastaðnum í Weiden.

Enn er til rannsóknar hvaða aðrir einstaklingar kunna að eiga þátt í málinu. Yfirvöld í Þýskalandi og Hollandi hafa varað neytendur við því að drekka úr þessum flöskum eða jafnvel snerta þær geti verið lífshættulegt og að fleiri flöskur geti enn verið í dreifingu. Í flöskunum var kampavínstegund sem ber heitið Moët & Chandon Ice Impérial. Kampavínið sem MDMA var blandað saman við er sagt vera rauðbrúnt á litinn.

Yfirvöld segja að lítill sopi af kampavíninu geti verið banvænn. Jafnvel það að dýfa fingri í kampavínið og sleikja hann til að finna bragðið, án þess að kyngja, geti til alvarlega vandarmál.

MDMA getur orsakað hættulega mikla hækkun líkamshita sem getur reynst banvænn. MDMA getur einnig valdið auknu álagi á hjarta fólks, hækkað hjartslátt og blóðþrýsting auk þess að valda nýrnaskemmdum.

CBS greindi frá.