Aðfaranótt 29. júlí 2021 var Geraldine Lumbo Dizon, hjúkrunarfræðingur, á næturvakt á Nepean einkasjúkrahúsinu í Kingswood í Sydney í Ástralíu. Ættingjar hennar hringdu í hana þessa nótt og til að hún gæti rætt við þá í friði slökkti hún á aðvörunarbjöllu hjartarita.

Mirror skýrir frá þessu og segir að dómstóll hafi nýlega komist að þeirri niðurstöðu að Dizon hafi ekki látið lækna vita af óreglulegum hjartslætti 85 ára sjúklings rétt áður en hann lést.

Hún var fundin sek um vanrækslu og ófagmannleg vinnubrögð. Hún var einnig fundin sek um að hafa ekki veitt sjúklingnum, sem var karlmaður, viðeigandi meðferð. Nýrna- og hjartastarfsemi hans brást á meðan Dizon talaði í símann.

Annað starfsfólk áttaði sig á að hún hafði tekið viðvörunarbjölluna úr sambandi því hún gleymdi að setja hana aftur í samband.

Dizon bar fyrir sig að hún hefði tekið bjölluna úr sambandi því hún hafi ruglað aðra sjúklinga sem hafi haldið að dyrabjalla væri að hringja.