The Guardian segir að tilraunabóluefni, sem byggist á sömu mRNA tækni og var notuð við þróun bóluefna gegn kórónuveirunni, hafi verndað mýs og frettur gegn alvarlegum inflúensuveirum. Þetta opnar á tilraunir á fólki með bóluefnið.
John Oxford, prófessor og veirufræðingur við Queen Mary háskólann í Lundúnum, segir að bóluefni, sem var þróað við University of Pennsylvania, geti verið tilbúið til notkunar eftir næsta vetur. Hann kom ekki að þróun þess.
Í samtali við BBC sagðist hann ekki geta lagt nægilega mikla áherslu á hversu mikilvæg þessi rannsókn sé. Möguleikarnir séu miklir. Hann sagðist telja að stundum vanmetum við þessa stóru öndunarfærasjúkdóma.
Vísindamenn hafa unnið að þróun allsherjar flensulyfs í rúmlega áratug en nýja rannsóknin, sem hefur verið birt í vísindaritinu Science, þykir vera stórt skref í átt að bóluefni sem geti verndað okkur gegn hugsanlega hörmulegum flensufaraldri.
Bóluefni, sem veita vernd gegn fjórum afbrigðum inflúensuveiru, eru uppfærð árlega til að tryggja að þau veiti góða vernd gegn þeim flensuveirum sem eru komnar á kreik.
Nýja bóluefnið er hannað til að styrkja ónæmiskerfið gegn öllum 20 undirtegundum inflúensu af bæði A og B stofni. Þannig verður líkaminn búinn undir að takast á við það flensuafbrigði sem fer á kreik hverju sinni.
