Allt frá því að hann var fimm ára borðaði Bøje Jørgensen, einnig þekktur sem „Pönnukökumaðurinn“ pönnukökur daglega og fátt annað. Hann bjó í Grindsted í Danmörku. Hann lést nýlega, 89 ára að aldri.

Vinur hans í 70 ár, Ole Borg Kristensen, skrifaði minningargrein um hann í Grindsted ugeavis. Í greininni segir Ole að vinur hans hafi ekki borðað mikið annað en pönnukökur nær allt líf sitt.

„Bøje lærði aldrei að borða kjöt. Ekki vegna þess að hann væri grænmetisæta, heldur einfaldlega vegna þess að hann var matvandur og dekraður sem barn. Skyndilega gat hann aðeins borðað pönnukökur, eplaskífur, eggjakökur og hvítt brauð,“ skrifar Ole.

Bøje var stangveiðimaður en borðaði samt aldrei fisk. Pönnukökur voru nánast það eina sem hann borðaði.