Þýska ríkisstjórnin hefur ákveðið að fresta lokun tveggja kjarnorkuvera vegna orkuvandans sem steðjar nú að Þýskalandi og nær allri Evrópu. Rússar hafa lokað fyrir gasstreymi til Evrópu og því er ekki ólíklegt að orkuskortur verði í álfunni í vetur.

Robert Habeck, efnahagsráðherra, sagði á mánudaginn að Neckarwestheim kjarnorkuverið í Baden Württemberg og Isar 2 í Bæjaralandi verði áfram í rekstri en til stóð að loka þeim. Þau munu verða varaaflsstöðvar þar til um mitt næsta ár. The Guardian skýrir frá þessu.

Hann sagði að orkuöryggi væri  mjög gott í Þýskalandi en kjarnorkuverin tvö verði „á viðbúnaðarstigi“ þar til í apríl 2023 ef nauðsynlegt verði að fá meira rafmagn inn í orkukerfið í suðurhluta landsins.

Verin verða tilbúin til notkunar, fullmönnuð en aðeins í viðbragðsstöðu og munu því ekki framleiða rafmagn nema nauðsyn krefji.

Habeck sagði að Þjóðverjar muni halda sig við áætlanir, sem eru bundnar í lög, um að hætta að nota kjarnorku.

Til stóð að loka verunum í lok desember. Það að lengja rekstartíma þeirra hefur ekki gríðarleg áhrif á rafmagnsframleiðsluna í landinu því verin framleiða aðeins 2% af allri raforku í landinu.