Nú herjar fjórða hitabylgja ársins á Frakkland með tilheyrandi þurrkum sem þóttu nú nægir áður. Það hefur vakið mikla reiði umhverfisverndarsinna og aðgerðarsinna að golfvellir eru að hluta undanþegnir banni við að vökvun.

Í 100 frönskum bæjum er skortur á drykkjarvatni og verður að flytja það til margra bæja í tankbílum.

Vegna þurrkanna og meðfylgjandi vatnsskorts hefur verið gripið til þess ráðs í stórum hluta landsins að banna fólki að vökva garða sína. En bannið nær ekki til golfvalla nema að hluta. Það má enn vökva þá að næturlagi en þó að hámarki með 30% þess vatnsmagns sem er venjulega notað.

Þetta hefur vakið mikla reiði umhverfisverndarsinna og aðgerðarsinna úr hreyfingunni Extinction Rebellion sem gripu nýlega til aðgerða á golfvöllum í Vieille–Toulouse og Blagnac að sögn BBC.

Þeir fylltu holurnar á golfvöllunum með steypu til að mótmæla því að enn megi vökva vellina nú í miðjum þurrkum. Þurrkum sem veðurstofa landsins segir þá verstu síðan byrjað var að mæla þurrka 1958.

Gerard Rougier, talsmaður franska golfsambandsins, sagði að sögn BBC að vellirnir komist ekki í gegnum þrjá daga án vatns. „Golfvöllur án flatar er eins og skautasvell án íss,“ sagði hann í samtali við France Info og benti á að 15.000 manns starfi á golfvöllum landsins.