Allt frá því að Rússar réðust inn í Úkraínu hafa vangaveltur verið uppi um hvort hann sé alvarlega veikur en nú hefur þessi ónafngreindi heimildarmaður the Daily Star gengið skrefinu lengra og segir að Pútín hafi verið alvarlega veikur um langa hríð og ef hann sé dáinn reyni samstarfsmenn hans að leyna því eins lengi og þeir geta til að halda völdum.
The Daily Star hefur eftir heimildarmanni að nýlegar upptökur af Pútín í sjónvarpi hafi líklega verið gerðar fyrir nokkru síðan. Einnig sé ekki útilokað að tvífari hans hafi komið fram á opinberum viðburðum, til dæmis Sigurdeginum sem Rússar fögnuðu fyrr í mánuðinum.
Annar heimildarmaður innan bresku leyniþjónustunnar sagði að Pútín sé búinn að vera mjög veikur og þegar hann deyi verði andlátinu haldið leyndu vikum saman, ef ekki mánuðum: „Sá möguleiki er einnig fyrir hendi að hann sé dáinn. Það er útilokað að vita. Það er talið að Pútín hafi verið með tvífara í vinnu þegar hann hefur verið veikur og að Kremlverjar geti verið með tvífara hans í vinnu núna. Pútín er foringi lítils hóps háttsettra embættismanna sem sýna honum algjöra hollustu. Það sem þeir óttast er að um leið og tilkynnt verður um andlát hans geti komið til valdaráns og að rússneskir hershöfðingjar vilji hörfa frá Úkraínu. Dauði Pútíns mun gera þá valdalausa og berskjaldaða, svo þeirra hagsmunir eru að segja að Pútín sé á lífi, þegar hið gagnstæða gæti verið satt.“
Að þessu sögðu er rétt að hafa í huga að the Daily Star er líklegast „gulasta“ breska götublaðið og þykja fréttir blaðsins ekki alltaf mjög nákvæmar.
