Vegna hnattrænnar hlýnunar verður ekki hægt að rækta kaffibaunir, kasjúhnetur og lárperur á sumum svæðum þar sem ræktun fer fram í dag. Hugsanlega eru aðeins nokkrir áratugir í að staðan verði orðin þannig að ræktun verði ekki lengur möguleg.

Þetta eru niðurstöður nýrrar rannsóknar þar sem vísindamenn tengdu saman spár um loftslagsbreytingarnar og upplýsingar um jarðveg á ýmsum svæðum til að gera reiknilíkan af hvernig ræktunarstaðan verður árið 2050. Rannsóknin leiddi í ljós að á öllum kaffiræktarsvæðum munu ræktunarskilyrðin fara versnandi, þar á meðal í Brasilíu, Víetnam, Indónesíu og Kólumbíu.

Hvað varðar ræktun kasjúhneta þá verða ræktunarsvæði í löndum á borð við Indland, Fílabeinsströndina og Benín ekki eins sjálfbær og áður og það sama á við um ræktunarsvæði lárpera í Perú og Indónesíu meðal annars.

Á móti kemur að ný ræktunarsvæði geta orðið til hærra yfir sjávarmáli samfara hlýnun og á öðrum breiddargráðum. Þar gætu Bandaríkin, Argentína, Kína og ríki í austanverðri Afríku komið sterk inn. The Guardian skýrir frá þessu.