Óhætt er að segja að það gangi vel hjá Apple að selja vörur sínar og þjónustu þessi misserin og virðist heimsfaraldur kórónuveirunnar ekki hafa afgerandi áhrif á afkomu fyrirtækisins. Það hefur verið skortur á kísilflögum í heiminum á síðustu misserum og það hefur haft áhrif á sölu margra raftækja en þrátt fyrir það var salan mjög góð hjá Apple á síðasta ársfjórðungi, sem lauk 25. desember.

Á ársfjórðungnum nam sala fyrirtækisins 123,9 milljörðum dollara. Það er 11% hærri upphæð en á sama tíma árið 2020 að því er segir í fréttatilkynningu frá Apple.

Haft er eftir Tim Cook, forstjóra fyrirtækisins, að þessi góða niðurstaða byggist á besta úrvali sögunnar hjá fyrirtækinu af vörum og þjónustu.

Söluhæsta varan var iPhone en salan á símunum stóð undir rúmlega helmingi veltunnar á fjórðungnum en hún nam 71,6 milljörðum dollara.