Kínversk yfirvöld reyna nú að berja útbreiðslu Ómíkronafbrigðis kórónuveirunnar niður í landinu. Þau hafa nú gripið til ansi óvenjulegra aðgerða í því skyni og er óhætt að segja að póststarfsmenn finni fyrir þeim.

Framvegis verður að sótthreinsa öll bréf og pakka sem berast til Kína frá útlöndum. Auk þess hvetur kínverska póstþjónustan landsmenn til að vera ekki að panta neitt frá útlöndum. Ástæðan er að yfirvöld segja að póstsendingar frá útlöndum séu ein af hugsanlegum orsökum nýlegra smita af völdum Ómíkron í landinu. Jótlandspósturinn skýrir frá þessu.

Nú er barist við fjölda minniháttar faraldra í landinu, þar á meðal í Peking en þar fara vetrarólympíuleikarnir fram í febrúar. Það liggur því á að berja þessa litlu faraldra niður og ná að koma í veg fyrir að útbreiðsla Ómíkron verði enn meiri. Í gær greindust 127 smit í Kína.

Á síðustu dögum hafa embættismenn sagt að í sumu tilfellum sé hugsanlegt að fólk hafi smitast af pökkum eða bréfum sem bárust frá útlöndum. Þeirra á meðal er kona í Peking sem greindist með afbrigði, sem er þekkt í Norður-Ameríku, en hafði ekki verið nærri neinum smituðum.

Í gær var starfsfólki póstþjónustunnar fyrirskipað að sótthreinsa alla pakka og bréf sem berast til landsins. Einnig eiga þeir sem starfa við flokkun á pósti frá útlöndum að láta bólusetja sig aftur gegn kórónuveirunni.

Einnig á að halda innlendum og erlendum pósti algjörlega aðskildum.