Það voru vísindamenn við Torontoháskóla sem gerðu rannsóknina. Hún leiddi einnig í ljós að það eru 15% meiri líkur á að vandamál komi upp hjá konum eftir skurðaðgerð ef skurðlæknirinn er karlkyns.
Rannsóknin hefur hleypt lífi í umræðu um hvort læknar verði fyrir ómeðvituðum áhrifum af kyni sjúklinganna. Unilad skýrir frá þessu.
Í rannsókninni voru gögn rúmlega 1,3 milljóna sjúklinga og tæplega 3.000 skurðlækna greind og útkoma 21 mismunandi aðgerða sem fólkið gekkst undir. Þetta voru allt frá einföldum hné- eða mjaðmaaðgerðum til flókinna hjartaaðgerða.
Rannsóknin leiddi í ljós að kyn skurðlæknisins skipti engu máli fyrir karla og að ef skurðlæknirinn var kona þá var útkoman hjá kvenkyns sjúklingum sú sama og hjá karlkyns sjúklingum, sem sagt enginn munur. En á hinn bóginn vissi það ekki á gott fyrir kvenkynssjúklinga ef skurðlæknirinn var karlmaður.
The Guardian segir að Angela Jerath, meðhöfundur að rannsókninni, hafi sagt að niðurstöðurnar hafi mikilvægar afleiðingar fyrir kvenkynssjúklinga: „Í rannsókn okkar höfum við sýnt fram á að við svíkjum suma kvenkynssjúklinga og að sumir „detta stundum á gólfið“ með óhagstæðum og í sumum tilfellum banvænum afleiðingum.“
Hún sagði einnig að niðurstöðurnar séu „áhyggjuefni“ og lagði áherslu á að karlkyns og kvenkyns skurðlæknar hljóti nákvæmlega sömu menntunina og æfingu og að því geti tæknilegar ástæður ekki legið að baki þessum mun.
Hún sagði að hugsanlega geti ástæðan verið „djúp og ómeðvituð hlutdrægni, stereótýpur og viðhorf.“
Scarlett McNally, skurðlæknir við Royal College of Surgeons of England, sagði í samtali við Guardian að hugsanlega sé ástæðan fyrir þessu að konur eigi auðveldara með að ræða við kynsystur sínar í hlutverki skurðlæknis en karla og að konur hafi oft meiri tilhneigingu til að fylgja ráðleggingum annarra kvenna.
