Það eru samtökin Texas Right to Life sem standa að baki síðunni en markmiðið með henni er að framfylgja nýrri fóstureyðingalöggjöf í ríkinu en hún er mjög ströng. Samkvæmt henni eru fóstureyðingar óheimilar eftir sjöttu viku meðgöngu. Síðan var sett á laggirnar til að fólk gæti sent inn ábendingar um hugsanleg brot á löggjöfinni.
En TikTok-notendur tóku sig saman og kaffærðu síðuna í „ábendingum“. Meðal þeirra voru allt handritið að teiknimyndinni Bee Movie, klámmyndir af Shrek og niðrandi skilaboð um ríkisstjórann Greg Abbott.
Að auki lögðu notendur samfélagsmiðilsins Reddit þessari árás lið. Meðal ábendinga sem voru sendar inn var að Greg Abbott hefði brotið lögin, að persónur úr ofurhetjumyndum Marvel vildu fara í fóstureyðingu og handritin að Twilightmyndunum voru send inn. NBC News og New York Times skýra frá þessu.
Á TikTok hvöttu ungmenni hvert annað til að senda inn falskar ábendingar og margir kóðar, sem gera notendum kleift að senda ábendingar á einfaldan hátt, voru birtir.
Á Twitter hófst herferð gegn GoDaddy sem hýsti heimasíðuna prolifewhistleblower.com og hafði selt umrætt lén. Herferðin gekk út á að heimasíðan bryti gegn reglum GoDaddy um að viðskiptavinir megi ekki safna upplýsingum um fólk sem hefur ekki veitt skriflegt samþykki fyrir því.
Þetta virkaði fljótt og á fimmtudaginn höfðu forsvarsmenn GoDaddy samband við forsvarsmenn Texas Right to Life og gáfu þeim sólarhring til að finna annað fyrirtæki til að sjá um hýsingu heimasíðunnar.
