Eyjan Evia er eitt þeirra svæða sem verst hafa orðið úti í eldunum en þar var áður mikið af barrtrjám. Hunangið frá eyjunni er mjög vinsælt og um þriðjungur af hunangsframleiðslu Grikkja á síðasta ári var frá eyjunni. En nú er staðan slæm.
Federico Facchin, býflugnasérfræðingur og pólitískur ráðgjafi hjá evrópsku landbúnaðarsamtökunum Copa-Cogeca segir að eldarnir hafi farið illa með býflugurnar á Evia. Hann sagði að bændur telji að rúmlega 10.000 bú hafi brunnið. Það mun draga mjög úr hunangsframleiðslu á þessu ári og næstu árin.
Fyrstu áætlanir hljóða upp á að Grikkland hafi misst rúmlega 10.000 tonn af hunangi vegna eldanna en 2019 var heildarframleiðslan í landinu 22.000 tonn.
Samdráttur í evrópskri hunangsframleiðslu mun valda því að meira verður flutt inn, aðallega frá Kína og Úkraínu en hunang þaðan er selt á um einum þriðja þess verðs sem evrópskt hunang er selt á. Bæði er framleiðslukostnaðurinn lægri þar og eftirlit ESB hefur leitt í ljós að oft er búið að þynna hunangið.
En þegar heildarmyndin er skoðuð þá er hunangsframleiðslan ekki stóri þátturinn því býflugurnar skipta gríðarlegu máli fyrir bæði dýr og fólk því þær sjá um að frjóvga blóm og plöntur.
Vistkerfi jarðarinnar eiga nú þegar mörg í vök að verjast og býflugur og aðrar flugur sem frjóvga plöntur eiga í vök að verjast.
Sameinuðu þjóðirnar segja að býflugur sjái um að frjóvga 71 af þeim 100 tegundum sem tryggja heimsbyggðinni 90% af matvælum sínum. Flugurnar leggja einnig sitt af mörkum við framleiðslu lyfja og lífræns eldsneytis.
