Það er óhætt að segja að norðlægir hvítir nashyrningar séu við það að deyja út en aðeins tvö kvendýr eru eftir á lífi. Þau eru á friðuðu svæði, Ol Pejeta, í Kenýa þar sem vopnaðir verðir gæta þeirra. Nú hafa vonir vaknað um að hugsanlega verði hægt að bjarga tegundinni frá útrýmingu.

Í síðustu viku skýrðu vísindamenn frá því að þeim hefði tekist að búa til þrjú ný fóstur af þessari tegund og eru þau nú orðin tólf. Þar sem bæði dýrin, sem enn lifa, eru kvendýr var þetta erfiðara en ella en með því að nota sæði úr tveimur dauðum karldýrum tókst að frjóvga egg úr kvendýrinu Fatu. Sæðið var fryst þegar karldýrin drápust.

Það voru ítalskir vísindamenn sem frjóvguðu eggin en bæði egg og sæði voru flutt á rannsóknarstofu á Ítalíu.

En þó búið sé að frjóvga eggin þá er enn langt í land með að afkvæmin líti dagsins ljós og það gerir verkefnið ekki auðveldara að hvorki Fatu, né móðir hennar Najin, geta gengið með fóstrin. Af þeim sökum verður þeim komið fyrir í náskyldum ættingjum þeirra, suðlægum hvítum nashyrningum, en um 18.000 dýr eru lifandi af þeirri tegund.

Richard Vigne, forstjóri Ol Pejeta, segist hafa trú á verkefninu en dregur ekki dul á að mikið sé í húfi. „Enginn lætur sem þetta verði auðvelt. Við gerum hluti sem eru nýir út frá vísindalegu sjónarmiði og við vinnum með erfðaefni þeirra tveggja dýra af þessari tegund sem enn eru lifandi. Það er margt sem getur farið úrskeiðis. Ég held að allir skilji hvaða áskoranir bíða okkar,“ sagði hann.