„Við völdum þetta nafn á dóttur okkar af því að það var einstakt og rómantísk,“ segir móðir lítillar ástralskrar stúlku. Hún komst síðar að því að eiginmaðurinn hafði platað hana upp úr skónum hvað varðar nafngiftina.

Þegar barn kemur í heiminn er margt sem foreldrarnir þurfa að taka afstöðu til og eitt stærsta málið er auðvitað nafn á barnið. Foreldrar stúlkunnar, sem búa í New South Wales, ákváðu að hún skyldi heita Lanesra. Hugmyndin kom frá manninum og fannst eiginkonunni þetta fullkomið nafn. „Við völdum þetta nafn á dóttur okkar af því að það var einstakt og rómantísk,“ hefur The Mirror eftir móðurinni.

En tveimur árum síðar afhjúpaði eiginmaðurinn ástæðuna fyrir að hann stakk upp á þessu nafni og er óhætt að segja að ástæðan hafi komið eiginkonunni algjörlega í opna skjöldu. „Það var ekki fyrr en hún var tveggja ára sem maðurinn minn sagði mér að nafnið væri nafnið á uppáhaldsfótboltaliðinu hans, Arsenal, skrifað aftur á bak,“ sagði móðirin.

Sagan fór á mikið flug á samfélagsmiðlum og þá kom í ljós að þetta var ekki í fyrsta sinn sem stuðningsmenn Arsenal höfðu leikið þann leik að skýra börn sín þessu sama nafni.