Á miðvikudag í síðustu viku myrti æstur múgur Djamel Ben Ismail, 38 ára alsírskan listamann, eftir að hann hafði ranglega verið sakaður um að hafa kveikt gróðurelda. Það hafði hann ekki gert, þvert á móti hafði hann komið á vettvang til að aðstoða við slökkvistarf. Lögreglan hefur handtekið 36 manns vegna málsins.

Sky News skýrir frá þessu. Fram kemur að eldar hafi verið kveiktir í Kabyle í Alsír á mánudag í síðustu viku og hafi orðið að minnsta kosti 47 íbúum héraðsins að bana og 28 hermönnum auk þess sem búfénaður drapst og gróður eyðilagðist.

Yfirmaður lögreglunnar í héraðinu sagði á sunnudaginn að Ismail hafi komið á vettvang á miðvikudaginn til að aðstoða við slökkvistörf. Hann var þá ranglega sakaður um að hafa kveikt eldana og réðst æstur múgur inn á litla lögreglustöð í bænum Larbaa Nath Irathen, þar sem hann naut verndar, og dró hann út á götu og gekk í skrokk á honum og kveikti að lokum í honum. Yfirmaður lögreglunnar sagði að lögreglumenn hefðu ekki viljað skjóta á múginn því þeir óttuðust að þá myndi ástandið versna enn frekar.

Meðal hinna handteknu eru þrjár konur og maður sem stungu Ismail ítrekað áður en eldur var borinn að honum.