Málið verður tekið fyrir hjá undirrétti í dag og er reiknað með að réttarhöldin standi í tólf daga. Lögreglumanninum hefur verið vikið frá störfum.
Í ákærunni kemur fram að hann er ákærður fyrir að hafa stundað kynlíf með þremur konum á grundvelli stöðu sinnar. Hann er ákærður fyrir að hafa ítrekað stundað kynlíf með konu, sem var upplýsingagjafi lögreglunnar í fíkniefnamálum, á árunum 2015 til 2019. Hann rannsakaði fjölda mála sem konan tengdist og var kunnugt um að hún var háð fíkniefnum. Þannig átti hann „auðveldara með að notfæra sér stöðu sína“ til að fá konuna til að stunda kynlíf, segir í ákærunni. Konan er meðal annars sögð hafa veitt honum munngælur á lögreglustöðinni. TV2 skýrir frá þessu.
Í nóvember 2016 tók maðurinn skýrslu af konu sem var þolandi í refsimáli. Önnur kona kom með henni í skýrslutökuna, henni til stuðnings. Daginn eftir yfirheyrsluna setti lögreglumaðurinn sig í samband við konuna, sem hafði fylgt vinkonu sinni í yfirheyrsluna, á grunni upplýsinga sem hann hafði aflað sér við yfirheyrsluna. Þau stunduðu síðan kynlíf heima hjá konunni. Tveimur og hálfu ári síðar lenti þessi kona í umferðarslysi og slasaðist. Áður en lögreglumaðurinn yfirheyrði hana vegna þess máls fór hann heim til hennar og þau stunduðu kynlíf, segir í ákærunni. Hann er einnig ákærður fyrir að hafa ítrekað stundað kynlíf með konu einni frá haustinu 2017 fram á haust 2018. Á sama tíma var hann að rannsaka ofbeldismál þar sem konan var þolandi.
Lögreglumaðurinn er sagður hafa sett sig í samband við tvær af konunum í október 2019 en þá var rannsókn hafin á málum hans. Í ákærunni kemur fram að hann hafi beðið aðra þeirra um að ljúga til um hvenær þau hefðu fyrst hist og hótaði henni að láta það leka út í undirheimana að hún væri upplýsingagjafi lögreglunnar varðandi fíkniefnamál. Hina bað hann um að þegja yfir að þau hefðu stundað kynlíf saman.
