Eftir þriggja daga innlögn og læknismeðferð „sýndi“ Trump umheiminum að sjúkdómurinn, sem hann hafði ítrekað gert lítið úr, hefði lítil áhrif á hann og flaug hann þá með þyrlu til Hvíta hússins. Þegar þangað var komið stillti hann sér upp á Trumansvölunum og tók af sér andlitsgrímuna til að sýna að hann væri hress og að veiran hefði ekki áhrif á hann.
En frænka hans, Mary Trump, gefur lítið fyrir þetta sjónarspil og segir í nýrri bók sinni að Trump hafi hermt eins vel eftir Benito Mussolini og hann gat þegar hann tók grímuna af sér til að sýna að hann væri ósæranlegur. En Mary, sem er sálfræðingur, segir að forsetinn hafi ekki blekkt hana. „Hann beit saman tönnum og kjálkinn skagaði fram. Nákvæmlega eins og hjá ömmu minni þegar hún beit á jaxlinn vegna verkja eða reiði. Ég sá þetta hjá Donald.“
„Ég er sjálf með astma og veit hvernig fólk lítur út þegar það berst við að ná andanum. Hann var með verki, hann var hræddur en það mun hann aldrei viðurkenna fyrir neinum eða sjálfum sér. Í hans augum eru afleiðingar þess að viðurkenna veikleika mun verri en að vera heiðarlegur,“ segir Mary í nýrri bók sinni „The Reckoning“ sem The Guardian hefur fengið í hendurnar.
Mary dregur enga dul á það í bókinni að hún er ekki hrifin af þeirri pólitík sem frændi hennar stendur fyrir og segir að í forsetatíð hans hafi valdið bandarísku þjóðinni áfalli. Hún segir einnig að staðhæfingar Trump um kosningasvindl í kjölfar ósigurs hans fyrir Joe Biden í kosningunum í nóvember hafi valdið reiði og hatri meðal þjóðarinnar og að þetta hafi verið bein árás á lýðræðið.
