Tveir af stærstu fjárfestum Danmerkur, lífeyrissjóðirnir LD Fonde og AkademikerPension, telja að laun æðstu stjórnenda fyrirtækja, sem eru skráð á hlutabréfamarkaði, séu ekki nægilega gegnsæ og að bónusar þeirra séu alltof háir. Segja má að þessir stóru fjárfestar hafi nú hrundið af stað atlögu að háum launagreiðslum til stjórnenda fyrirtækja í Danmörku. Fulltrúar sjóðanna hafa á þessu ári greitt atkvæði gegn launahækkunum og bónusgreiðslum til stjórnenda fyrirtækja á aðalfundum þeirra.

Jótlandspósturinn hefur eftir Anders Schelde, fjárfestingarstjóra hjá AkademikerPension, að gegnsæi skorti víða og oft sé jafnvægið á milli bónusa og fastra launa skakkt. Sjóðurinn á eignir upp á 140 milljarða danskra króna og er því stór aðili á hlutabréfamarkaðnum.

„Í flestum fyrirtækjum eru laun forstjóranna bara dropi í hafið en bara af því að það er mikið af peningum á maður ekki að taka þá alla,“ er haft eftir honum.

Hjá LD Fonde, sem á eignir upp á 55 milljarða danskra króna, er fólk sömu skoðunar og segir að fram að þessu hafi ekki verið tekið tillit til loftslagsmála, félagslegrar ábyrgðar og góðra stjórnunarhátta þegar bónusar stjórnenda eru ákveðnir.