Rússneski lögreglumaðurinn Alexei Safonov var nýlega handtekinn ásamt sex öðrum í Stavropol í Rússlandi. Hann er grunaður um að hafa verið í forystu fyrir glæpagengi sem tók við milljónum rúbla í mútur frá flutningafyrirtækjum.

Miðað við fréttir erlendra fjölmiðla þá virðist Safonov hafa lifað hátt og mun betur en hann átti að geta á launum lögreglumanns en hann starfaði í umferðardeild lögreglunnar.

Rússneskir embættismenn hafa birt ljósmyndir af höll Safonov og innbúinu. Óhætt er að segja að herbergin séu glæsileg, skreytingarnar vel úr garði gerðar og klósettið er meira að segja gyllt en ekki fylgir sögunni hvort það sé úr gulli.

Safonov er grunaður um að hafa verið forsprakki glæpagengis sem gaf út leyfi til flutningafyrirtækja, sem flytja korn, gegn greiðslu. Leyfin veittu fyrirtækjunum heimild til að hunsa lög og reglur, jafnvel þegar þau fluttu korn í gegnum varðstöðvar lögreglunnar.

Rússneska sambandslögreglan, nokkurs konar jafngildi FBI í Bandaríkjunum, segir að glæpagengið hafi þegið 19 milljónir rúbla í mútur en það svarar til um 32 milljóna íslenskra króna.

Alexander Khinshteyn, þingmaður úr flokki Vladimír Pútíns, Sameinuðu Rússlandi, segir að á fjórða tug lögreglumanna hafi verið handtekinn vegna málsins. Húsleitir voru gerðar á 80 stöðum og hald var lagt á reiðufé, dýra bíla og skjöl.