Sá hryllilegi atburður átti sér stað í Colindale í London í gærkvöldi að þrír aðilar urðu fórnarlömb sýruárásar, þeirra á meðal tíu ára barn.
Þegar viðbragðsaðilar komu á staðinn fundnu þeir konu á fertugsaldri, mann á fimmtugsaldri og tíu ára barn slösuð eftir að sýru var hellt yfir þau.
Öll þrjú voru færð á sjúkrahús og teljast ekki í lífshættu. Atvikið vakti mikinn óhug meðal nágranna sem sögðu að árásin hafi átt sér stað er „ókunnugur aðili bankaði á hurðina“ hjá fjölskyldunni og hellti í kjölfarið sýru yfir þau.
Einn nágranninn sagði „Ég sá litla stelpu koma þaðan út í náttfötum, engum skóm ásamt fullorðinni konu. Báðar voru fluttar burt í sjúkrabíl. Ég er viss um að þetta hafi verið sýruárás þar sem lögreglan hljóp þarna inn með vatnsflöskur.“
Annar sagði: „Mér skilst að ókunnugur aðili hafi bankað á hurðina hjá þeim, þau komu til dyra og urðu fyrir árás.“
Myndir af vettvangi sýna stóran svartan brunablett á gólfinu fyrir utan íbúðina og sjást þar ummerki um vökva.
Lögregla segir að málið sé nú til rannsóknar en enginn hefur verið handtekinn.
