Á fimmtudaginn handtók spænska lögreglan Svía sem var eftirlýstur fyrir morðið á hinni 12 ára Adriana í Botkyrka, í útjaðri Stokkhólms, í ágúst á síðasta ári. Hann verður framseldur til Svíþjóðar innan skamms.

Sænska lögreglan skýrði frá þessu á föstudaginn. Adriana var skotin til bana aðfaranótt 2. ágúst á síðasta ári þegar hún gekk fram hjá veitingastað McDonald’s en hún var úti að viðra hundinn sinn. Skotið var á hana út um glugga á hvítri Audi bifreið.

Talið er að ekki hafi verið ætlunin að skjóta hana heldur tvo aðila sem tengjast skipulögðum glæpasamtökum í Svíþjóð. Adriana var hins vegar sú eina sem varð fyrir skotum. Hún lést af völdum áverka sinna nokkrum klukkustundum síðar.

Einn situr nú þegar í gæsluvarðhaldi í Svíþjóð vegna gruns um að hann hafi átt aðild að morðinu.