Í Bandaríkjunum, Kanada og Mexíkó fer smitum nú fækkandi en þróunin er á hinn veginn í Suður-Ameríku og Mið-Ameríku. Mesta aukningin er í Kólumbíu en þar hefur smitum fjölgað þrefalt í sumum héruðum. Í Brasilíu fer smitum og sjúkrahúsinnlögnum einnig fjölgandi.
Ástandið er einnig slæmt á Haítí en þrátt fyrir mikla fjölgun dauðsfalla fara íbúarnir ekki eftir ráðleggingum yfirvalda um að stunda félagsforðun og raunar hunsa íbúarnir flestar þær ráðleggingar sem yfirvöld senda frá sér varðandi sóttvarnaaðgerðir.
Talsmenn Paho segja að núna sé það þróunin á Haítí sem valdi þeim mestum áhyggjum en það þykir þó ljós í myrkrinu að yfirvöld þar hafa ákveðið að hefja bólusetningar með bóluefni AstraZeneca sem er sent til fátækra ríkja á vegum Covax-samstarfsins sem Alþjóðaheilbrigðismálastofnunin WHO hefur yfirumsjón með.
Í Suður-Ameríku og Karíbahafi hafa rúmlega 33 milljónir smita greinst og rúmlega ein milljón dauðsfalla hefur verið skráð.
