Hann tók þátt í hópakstri mótorhjólafólksins og veifaði grímulaus til áhorfenda og notaði tækifærið til að halda því fram að andlitsgrímur séu gagnslausar fyrir fólk sem búið er að bólusetja gegn kórónuveirunni. Þetta sagði hann þegar hann ávarpaði stuðningsfólk sitt í tengslum við samkomuna.
„Allir þeir sem eru á móti þessu eru það af því að þeir trúa ekki á vísindin af því að ef fólk er bólusett er engin leið að veiran geti smitast,“ sagði Bolsonaro við stuðningsfólk sitt. Sérfræðingar eru flestir ósammála þessu og telja andlitsgrímur gera gagn við að halda aftur af útbreiðslu kórónuveirunnar.
Sky News segir að aðeins sé búið að bólusetja tæplega 12% Brasilíumanna að fullu og telja margir sérfræðingar að rétt sé að láta grímuskyldu vera áfram í gildi þar til búið er að bólusetja fleiri.
Yfirvöld í Sao Paulo staðfestu síðar að Bolsonaro hefði verið sektaður um sem nemur 13.000 íslenskum krónum fyrir að brjóta lög ríkisins um notkun andlitsgríma. Hann var sektaður fyrir samskonar brot í Maranhao í maí.
Rúmlega 480.000 manns hafa látist af völdum COVID-19 í Brasilíu en Bolsonaro, sem er mjög hægrisinnaður, hefur hvað eftir annað gert lítið úr alvarleika heimsfaraldursins.
