Tilkynnt var um þrjár sprengingar í Malmö í Svíþjóð í nótt. Sú fyrsta var utanhúss í Docentgatan klukkan 02.45. Klukkan þrjú var tilkynnt um sprengingu innanhúss á Nydalavägen sem er skammt frá Docentgatan. Tilkynnt var um þá þriðju klukkan 03.18 en hún var utanhúss á Sörbäcksgatan.

Sydsvenskan skýrir frá þessu. Fram kemur að á Sörbäcksgatan hafi sprengja sprungið við verslun á jarðhæð húss. Á Nydalavägen þurfti að rýma stigagang í fjölbýlishúsi eftir sprenginguna. Einn var fluttur á sjúkrahús eftir sprenginguna þar.

Talsmaður lögreglunnar sagði að lögreglan væri við störf á öllum þremur stöðunum og að lítið tjón hafi orðið. Á Docengatan voru sprengjusérfræðingar lögreglunnar að störfum í nótt en þar leikur grunur á að sé ósprungin sprengja.

Lögreglan telur að sprengingarnar tengist.