Á sunnudaginn lést Raziv Hilly, 29 ára, þegar sprengja úr síðari heimsstyrjöldinni sprakk á Salómonseyjum í Kyrrahafi. Það eru margir áratugir síðan að bandarískar hersveitir yfirgáfu eyjarnar en íbúarnir búa enn við hættu sem stafar af sprengjum úr síðari heimsstyrjöldinni. Dauði Hilly hefur vakið upp háværar raddir um að Bandaríkjamenn og aðrir fjarlægi sprengjur og önnur hættuleg vopn sem urðu eftir á eyjunum eftir síðari heimsstyrjöldina.

Á síðasta ári létust tveir ástralskir sprengjusérfræðingar þegar þeir voru við störf á eyjunum. Á sunnudaginn lést Hilly þegar sprengja sprakk og þrír særðust. Tveir þeirra eru í lífshættu en sá þriðji er lítið meiddur.

Talsmaður lögreglunnar sagði að sprengjan hafi sprungið þegar fjáröflunarsamkoma stóð yfir í höfuðborginni Honiara. Hópur fólks ákvað að kveikja eld til að elda mat yfir á meðan á samkomunni stóð. Fólkið vissi ekki að undir bálkestinum var bandarísk sprengja síðan úr síðari heimsstyrjöldinni. Hún sprakk síðan með fyrrgreindum afleiðingum. Sky News skýrir frá þessu.