Faraldurinn er við það að leggja heilbrigðiskerfið í Brasilíu á hliðina og vísindamenn spá því að dauðsföllum muni fjölga á næstunni og verða fleiri en þegar verst lét í janúar í Bandaríkjunum.
Íbúafjöldinn í Brasilíu er um tveir þriðju af því sem hann er í Bandaríkjunum en nú hafa 337.000 látist af völdum COVID-19 í landinu en 550.000 í Bandaríkjunum. Þessi tvö lönd verma toppsætið á lista yfir þau lönd þar sem flestir hafa látist.
Í Bandaríkjunum hefur áhersla verið lögð á að bólusetja sem flesta en í Brasilíu hefur lítið verið um sóttvarnaaðgerðir og forseti landsins, Jair Bolsonaro, hefur í raun gert lítið úr faraldrinum og sagt hann vera eins og hverja aðra kvefpest og varpað þeirri spurningu fram hvenær fólk ætli að hætta að væla yfir faraldrinum.
Sky News hefur eftir Miguel Nicolelis, brasilískum lækni sem er prófessor við Duke háskólann, að ástandið í Brasilíu líkist því að kjarnakljúfur hafi hrundið keðjuverkun af stað og hún sé stjórnlaus. „Þetta er líffræðilegt Fukushima,“ sagði hann.
Sjónarvottar segja að ástandið á sjúkrahúsum líkist ástandinu á miðöldum þegar plágur herjuðu, súrefni er að verða á þrotum og sjúkrahúsin eru yfirfull. Spár gera ráð fyrir að í næstu viku slái Brasilía sorglegt met Bandaríkjanna hvað varðar meðaltal látinna á sjö dögum.
