Kórónuveirufaraldurinn herjar nú af miklum krafti á Indlandi og er ástandið í landinu mjög alvarlegt vegna þessa. Nú hefur faraldur brotist út meðal bandarískra stjórnarerindreka og innfæddra starfsmanna sendiráðsins. Rúmlega 100 hafa greinst með veiruna á undanförnum vikum og tveir indverskir starfsmenn létust nýlega af völdum COVID-19.

CNN skýrir frá þessu. Fram kemur að Bandaríkin reki fimm sendiskrifstofur í landinu auk sendiráðs í Nýju Delí.

Byrjað var að bólusetja starfsmenn sendiráðanna og fjölskyldur þeirra fyrir tveimur vikum. CNN hefur eftir heimildarmönnum að það hafi vakið töluverða óánægju meðal starfsmanna að þeir hafi fengið litlar upplýsingar um hvenær yrði bólusett og að þeim hafi fundist þeir sitja á hakanum því margir stjórnarerindrekar í Evrópu hafi nú þegar verið bólusettir.