Í vikunni var tilkynnt að Harry prins væri búinn að fá vinnu hjá fyrirtækinu BetterUps. En þrátt fyrir að um skrifstofuvinnu sé að ræða þýðir það ekki að vinnudagurinn hjá Harry verði hefðbundinn vinnudagur skrifstofumanns.

Alexi Robichaux, nýr yfirmaður hans, hefur skýrt frá ýmsu er varðar nýju vinnuna og hvernig dagarnir verða hjá Harry. Samkvæmt fréttum Sky News og The Daily Mail þá mun Harry vinna með app sem verður markaðssett fyrir þúsaldarkynslóðina en markhópurinn er ungt fólk.

Þegar sóttvarnaaðgerðir leyfa mun Harry vinna á skrifstofu fyrirtækisins í San Francisco. Þar getur hann sótt jógatíma, æft sig í boxi eða haft það huggulegt með skrifstofuhundinum Gordo. Harry fær einnig að taka hundana sína tvo með í vinnuna ef hann vill.

BetterUp er fjörugur vinnustaður og þar eru oft haldin þemapartý fyrir starfsfólkið. Á LinkedIn markaðssetur fyrirtækið sig sem líflegt fyrirtæki þar sem eitt og annað gerist.

Starfsheiti Harry er „Chief Impact Officer“ og sagði Robichaux í samtali við Sky News að Harry muni vinna við ýmislegt, þar á meðal vöruþróun, viðskiptaþróun, þróa upplifanir fyrir viðskiptavini og koma að ýmsu samstarfi.

Ekki hefur komið fram hvað Harry fær í laun en vitað er að fyrirtækið selur þjónustu sína dýrt en þar starfa um 200 manns. Fyrirtækið er metið á 1,73 milljarða dollara.