Bandarískar leyniþjónustustofnanir telja að Norður-Kórea sé hugsanlega að undirbúa fyrstu vopnatilraunir sínar síðan Joe Biden tók við embætti forseta Bandaríkjanna.

CNN skýrir frá þessu og hefur eftir ónafngreindum heimildarmönnum innan bandaríska stjórnkerfisins.

Það gæti einnig skýrt tímasetninguna að nú stendur yfir sameiginleg heræfing Bandaríkjanna og Suður-Kóreu sem er þó mun minni að umfangi en til stóð. Það hleypir einnig illu blóði í Norður-Kóreumenn að Tony Blinken, utanríkisráðherra Bandaríkjanna, og Lloyd Austin, varnarmálaráðherra, eru nú í Asíu að ræða við japanska og suður-kóreska embættismenn.

Sérfræðingar sögðu í samtali við CNN að það þurfi ekki að koma á óvart ef Norður-Kórea gerir einhverjar vopnatilraunir núna en það sé oft gert þegar stjórnarskipti eru í Bandaríkjunum og Suður-Kóreu.

Norður-Kórea hefur á undanförnum árum gert margar tilraunir með langdrægar eldflaugar og kjarnorkuvopn.