Í nágrannaríkjum Svíþjóðar hefur verið gripið til umfangsmikilla sóttvarnaaðgerða til að halda aftur af útbreiðslu kórónuveirunnar en Svíar hafa farið sínar eigin leiðir og ekki gripið til harðra sóttvarnaaðgerða. En eftir því sem dánartölurnar, af völdum COVID-19, hafa hækkað hefur traust almennings í garð yfirvalda minnkað.
Nú hafa um 12.000 Svíar látist af völdum veirunnar. Í nýrri skoðanakönnun sem Dagens Nyheter og Ipsos gerðu kemur fram að aðeins 26% Svía telja að ríkisstjórn Löfven og yfirvöld hafi brugðist rétt við heimsfaraldrinum. Í desember var hlutfallið 34%.
Þeim sem finnst að Löfven standi sig almennt vel hefur einnig fækkað mikið síðan í maí eða um helming. 37% telja hann beinlínis hafa staðið sig illa. Niðurstöður könnunar sem Sænska ríkisútvarpið og Novus gerðu sýna að 43% bera lítið eða mjög lítið traust í garð Löfven.
Jótlandspósturinn hefur eftir Drude Dahlerup, prófessor í stjórnmálafræði við Stokkhólmsháskóla og Háskólann í Hróarskeldu, að það sé enginn vafi á því að kjósendur séu að refsa Löfven og yfirvöldum fyrir viðbrögðin við heimsfaraldrinum.
Hans Mouritzen, hjá Dansk Institut for International Studier, sem er sérfræðingur í sænskum stjórnmálum sagði að það hjálpi sænskum yfirvöldum ekki að nágrannaríkin hafi gripið til gjörólíkra aðgerða en þau sænsku. Fólk beri Svíþjóð saman við hin Norðurlöndin þar sem miklu færri hafa látist. Löfven hafi getað ýtt ábyrgðinni að hluta yfir á heilbrigðisyfirvöld en ekki öllu. Hann sagði að umsvif glæpagengja í landinu komi einnig við sögu varðandi vantraust almennings í garð Löfven.
