Alþjóðaheilbrigðismálastofnunin WHO segir að allt að 500.000 Evrópubúar geti látist af völdum COVID-19 fram í febrúar. Þetta sagði Hans Kluge, svæðisstjóri WHO í Evrópu, í gær og sagðist hann hafa „miklar áhyggjur“ af þróun heimsfaraldursins í álfunni.

Smitum fer fjölgandi í mörgum löndum og síðustu sjö daga var met sett í Þýskalandi varðandi fjölda smita á einni viku, voru þau tæplega 169.000. Sömu sögu er að segja í Danmörku, þar fer smitum fjölgandi en í gær greindust 2.598 smit og hafa ekki greinst fleiri á einum degi á þessu ári.

Kluge sagði að áætlunin um allt að 500.000 dauðsföll til viðbótar sé byggð á trúverðugum útreikningi á þróun faraldursins miðað við núverandi stöðu. Hann sagði Evrópu enn á ný vera orðna miðpunkt faraldursins.