Á fimmtudaginn fundu breskir tollverðir 418 kíló af kókaíni í sendingu af laukhringjum sem kom frá Frakklandi. Söluverðmæti eiturlyfsins er sem svarar til um 6 milljarða íslenskra króna. Þrítugur maður, Piotr Perzenowski, var handtekinn vegna málsins.

CNN segir að fíkniefnin hafi fundist við leit í farmi af laukhringjum sem var að koma frá Coquelles í Frakklandi.

Perzenowski var færður fyrir dómara á laugardaginn og úrskurðaður í gæsluvarðhald. Hann á að koma aftur fyrir dómara 13. desember.

Mark Howes, deildarstjóri hjá National Crime Agency, sagði að í málinu hafi mjög mikið af fíkniefnum verið haldlagt áður en tókst að koma þeim á markaðinn. CNN hefur einnig eftir honum að haldlagningin komi í veg fyrir að glæpahópar hagnist mikið og það sé þungt högg fyrir þá.