Nýlega birtu vísindamenn við Kaupmannahafnarháskóla rannsókn þar sem komist var að þeirri niðurstöðu að danska lögreglan beiti minnihlutahópa misrétti. En nú hafa vísindamennirnir neyðst til að draga rannsóknina til baka en hún hafði vakið upp miklar og heitar umræður í Danmörku.

Í fréttatilkynningu frá Kaupmannahafnarháskóla kemur fram að rannsóknin hafi verið dregin til baka vegna villu í henni. Í rannsókninni var meðal annars komist að þeirri niðurstöðu að lögreglan kæri fólk úr minnihlutahópum oftar án þess að kærurnar endi með dómi og voru minnihlutahóparnir þá bornir saman við fólk af dönskum ættum.

Mikkel Jarls Christensen, einn af vísindamönnunum sem gerðu rannsóknina, segir að þeir hafi gert mistök við úrvinnslu gagna. Í fréttatilkynningunni er haft eftir honum að eftir að rannsóknin hafði verið ritrýnd og samþykkt til birtingar í vísindariti hafi vísindamennirnir áttað sig á villu við úrvinnslu gagna í upphafi rannsóknarinnar. Þetta séu tölur yfir ákærur og kærur, notast hafi verið við tölur um ákærur en ekki kærur en rannsóknin snýst um kærur. „Þrátt fyrir að kærur hafi eðli málsins samkvæmt áhrif á ákærur þá eru þær ekki sami hluturinn,“ er haft eftir honum.

Vísindamennirnir höfðu komist að þeirri niðurstöðu að 92% af öllum kærum á hendur Dönum enduðu með dómum en hjá til dæmis fólki af sómölskum uppruna væri hlutfallið 79%. En þessar tölur eru ekki réttar eins og nú liggur fyrir.