Í tvær vikur hefur ekkert spurst til Beata Ratzman og umfangsmikil leit hefur staðið yfir henni í Oxie í Svíþjóð. Ekkert hefur fundist sem getur varpað ljósi á hvar hún er. Beata er 32 ára og á eitt barn. Eiginmaður hennar hefur verið handtekinn.

Aftonbladet segir að lögreglan hafi leitað með hundum, úr lofti, í vötnum og á landi og hafi fengið aðstoð frá samtökunum Missing People.

Blaðið segir að eiginmaður konunnar hafi verið handtekinn vegna hvarfs hennar en hún sást síðast 24. september. Hann er á fimmtugsaldri og er í gæsluvarðhaldi. Hann var handtekinn aðfaranótt 25. september níu klukkustundum eftir að síðast sást til Beata.

Beata, sem er frá Póllandi, sótti um skilnað frá honum í ágúst og fullt forræði yfir barni þeirra. Skömmu síðar kærði hún hann fyrir ofbeldi og hótanir sem áttu sér stað á árunum frá 2016 til 2021. Tveimur vikum áður en hún hvarf fór hún fram á nálgunarbann en við því var ekki orðið.

Flestir ættingjar Beata búa í Póllandi en hún hefur búið í Svíþjóð í 9 ár.