Tom Hagen var handtekinn einu og hálfu ári eftir hvarfið, grunaður um aðild að því og morðinu á Anne-Elisabeth. Hann hefur ávallt neitað sök og öllum tengslum við málið. Hann segist telja að óþekktir gerendur hafi numið Anne-Elisabeth á brott til að hagnast. Á heimil hjónanna fundust miðar með kröfu um greiðslu lausnargjalds.
„Það segir sig sjálft að það veldur miklu álagi að vera grunaður um morð,“ segir Svein Holden, verjandi Tom Hagen, í heimildarmynd TV2 um málið en hún heitir „Forsvinningen på Lørenskog“.
Um 30 lögreglumenn vinna enn af fullum krafti við rannsókn málsins. Holden sagði að Hagen vonist enn til að hægt verði að upplýsa málið. „Annars vegar gleðjumst við yfir að svo margir vinni enn við rannsókn málsins og að lögreglan segi að von sé um að hægt verði að leysa það. Hins vegar er það mikið álag fyrir Hagen að vera grunaður,“ segir Holden.
„Ég þekki málsgögnin og ég er fullkomlega viss um að málið gegn Hagen verður lagt upp,“ segir Holden án þess að fara nánar út í af hverju hann telur að lögreglan muni ekki ákæra Hagen.
Hann segir að í hans huga sé það gríðarlega mikilvægt atriði að Tom Hagen var í vinnunni þegar Anne-Elisabeth hvarf. TV2 segir að lögreglan telji einnig að hann hafi verið í vinnunni, skammt frá heimili hjónanna, þegar eiginkona hans hvarf.
Fyrir dómi hefur komið fram að lögreglan telur að Tom Hagen hafi fengið einhvern eða einhverja til að nema eiginkonu hans á brott og hann hafi síðan séð um fjarlægja ummerki af vettvangi og þrífa.
