Kínversk stjórnvöld eru þekkt fyrir að vera með fingurna í öllu og vilja stjórna lífi landsmanna eins mikið og þau geta. Nýjasta tiltæki þeirra er að nú verða þeir sem vilja spila tölvuleiki á netinu að skrá sig undir réttu nafni og þeir sem eru yngri en 18 ára mega aðeins spila á milli klukkan 20 og 21 á föstudögum, laugardögum, sunnudögum og almennum frídögum.

Sky News skýrir frá þessu. Fram kemur að netfyrirtækjum verði gert að framfylgja þessu en þau framfylgja nú þegar ströngum kröfum um að notendur verða að skrá sig undir réttu nafni til að geta spilað tölvuleiki.

Tilkynnt var um þessar nýju reglur á kínverska samfélagsmiðlinum Weibo af dagblaðinu The People‘s Daily en það er opinbert dagblað kommúnistaflokksins.

Nýlega sögðu kínverskir ríkisfjölmiðlar að tölvuleikjafyrirtæki framleiddu „andlegt ópíum“ og líktu þeim við „rafræn eiturlyf“ en í kjölfarið lækkaði verð hlutabréfa í stærstu kínversku tölvuleikjafyrirtækjunum mikið.