Starfsfólk í grunnskólum í New York borg verður nú að láta bólusetja sig ef það vill geta mætt til vinnu á næsta skólaári. Fram að þessu hefur það getað komist hjá bólusetningu með því að framvísa neikvæðri niðurstöðu úr sýnatöku.

Um 148.000 manns er að ræða. Bill de Blasio, borgarstjóri, tilkynnti þetta í gær. Þarf fólkið að vera búið að fá að minnsta kosti fyrri skammtinn af bóluefni fyrir 27. september.

New York slæst þar með í hóp með Los Angeles, Chicago og Washington D.C. þar sem sömu kröfur eru gerðar til starfsfólks grunnskóla.

„Við viljum að skólarnir okkar séu mjög öruggir allt árið,“ sagði de Blasio á fréttamannafundi.

Skólaárið hefst þann 13. september næstkomandi í New York.