Á föstudaginn fengu lögreglumenn í Hampden í Massachusetts í Bandaríkjunum gefna út handtökuskipun á hendur kaþólska prestinum Richard R. Lavigne en hann er grunaður um að hafa myrt 13 ára pilt fyrir tæpri hálfri öld.  Ekki varð þó af því að Lavigne væri handtekinn því hann lést á sjúkrahúsi á föstudagskvöldið.

CNN skýrir frá þessu. Fram kemur að saksóknari hafi skýrt frá því að Lavigne hafi verið veikur um langa hríð.

Saksóknari segist fullviss um að Lavigne hafi myrt Daniel Croteau, 13 ára, þann 14. apríl 1972. Hann fannst látinn í Connecticut River í Chicopee í Massachusetts. Hann var í fötunum sem hann hafði klæðst í kaþólska skólanum, sem hann sótti, daginn áður.

Daniel og bræður hans voru altarisdrengir hjá Lavigne í Saint Catherine of Sienna í Springfield. Lavigne fór margoft með bræðurna í ferðalög og hafði boðið þeim að gista heima hjá foreldrum sínum í Chicopee nokkrum sinnum.

Lavigne var rekinn úr starfi hjá kaþólsku kirkjunni 2004 en margar kvartanir höfðu borist um ósæmilega hegðun hans, þar á meðal kynferðisbrot.

Lögreglan yfirheyrði Lavigne í apríl og maí á þessu ári en hann játaði ekki að hafa myrt Daniel. Hann reyndi að villa um fyrir lögreglunni að sögn saksóknara sem sagðist þess fullviss að Lavigne hafi myrt Daniel í apríl 1972. Foreldrar hans eru látnir en bróðir hans, Joe Croteau, þakkaði lögreglunni fyrir að hafa leyst málið.