Vegna stöðu kórónuveirufaraldursins í Japan ráða bandarísk stjórnvöld fólki frá því að fara til Japan. Ástæðan er auðvitað hættan á að fólk smitist af kórónuveirunni. Þetta kemur á slæmum tíma fyrir Japan en nú eru aðeins um tveir mánuðir þar til Ólympíuleikarnir eiga að hefjast í Tókýó.

Samkvæmt ferðaráðleggingum bandaríska utanríkisráðuneytisins kemur fram að Japan sé nú  í hæsta áhættuflokki að mati bandarísku smitsjúkdómastofnunarinnar. Því eigi fólk að forðast að ferðast þangað.

Fram kemur að vegna þess hvernig ástandið er í landinu eigi jafnvel bólusett fólk á hættu að smitast af kórónuveirunni og bera hana með sér og smita aðra.

Bandarísk stjórnvöld skilgreina 80% af heimsbyggðinni sem áhættusvæði í hæsta flokki vegna heimsfaraldursins.

Nú greinast um 6.000 smit á dag í Japan en voru um 1.000 í mars. Aðeins er búið að bólusetja um tvö prósent þjóðarinnar með að minnsta kosti einum skammti. Ástæðan er skortur á heilbrigðisstarfsfólki og sprautum.