Kínversk yfirvöld hafa lokað fyrir aðgang fjallgöngumanna að Mount Everest, hæsta fjalli heims, það sem eftir lifir fjallgöngutímabilsins. Ástæðan er heimsfaraldur kórónuveirunnar. Samkvæmt frétt Xinhua ríkisfréttastofunnar hefur leyfi eina fyrirtækisins, sem má skipuleggja ferðir upp á fjallið frá Tíbet, verið afturkallað að sinni.

Afturköllunin er sögð vera til að koma í veg fyrir „innflutning á kórónuveirunni“. 21 Kínverji hafði fengið leyfi til að klífa fjallið að þessu sinni en þeir verða nú að bíta í það súra epli að fá ekki að fara upp á fjallið.

Fyrir rúmri viku skýrðu kínverskir ríkisfjölmiðlar frá því að stefnt væri að því að koma upp einhverskonar „aðskilnaðarlínu“ á toppi fjallsins til að koma í veg fyrir að fjallgöngumenn, sem koma frá Nepal, og þeir sem koma frá Tíbet gætu hist á toppnum. Þetta átti að gera til að koma í veg fyrir að kórónuveiran smitaðist á milli fólks á toppi fjallsins.

Kórónuveirusmitum hefur fjölgað mikið í Nepal að undanförnu og hafa rúmlega 8.000 smit greinst á sólarhring að undanförnu. Þetta hefur orðið til þess að sum fyrirtæki, sem skipuleggja ferðir upp á topp Everest, hafa hætt við þær.

Smit hafa einnig komið upp í grunnbúðunum við fjallið og ríkir mikil óvissa um framhald fjallgöngutímabilsins. 400 fjallgöngumenn hafa fengið leyfi yfirvalda í Nepal til að ganga á fjallið að þessu sinni.