Hann segir að þessir hlutir hafi líkst þeim sem sjást á upptökum sem liðsmenn sjóhersins gerðu og hafa verið birtar. Varnarmálaráðuneytið hefur staðfest að þær upptökur séu ófalsaðar en þær voru gerðar nærri San Diego. Graves segir að þessir óþekktu fljúgandi furðuhlutir séu ógn við öryggi Bandaríkjanna.
Frásögn Graves kemur aðeins mánuði áður en yfirvöld birta skýrslu frá bandarískum leyniþjónustustofnunum um óþekkta fljúgandi furðuhluti.
Í þættinum, sem var sýndur í gærkvöldi, sagðist Graves vera áhyggjufullur. Hann sagði að ef um herflugvélar frá öðru ríki hefði verið að ræða þá væri það stórmál. „En af því að þessir hlutir líta aðeins öðruvísi út erum við ekki reiðubúin til að horfast í augu við vandann. Við sættum okkur við að hunsa þá staðreynd að þessir hlutir eru þarna alla daga, fylgjast með okkur alla daga,“ sagði hann.
Hann sagði að erfitt væri að útskýra hvað þetta væri. Hlutirnir snúist, fljúgi í mikilli hæð. „Ég veit ekki. Ég veit ekki hvað þetta er, í hreinskilni sagt. Ég myndi segja að líklega sé verið að fylgjast með okkur og hvort hætta stafi af okkur,“ sagði hann.
Fyrrum embættismaður, sem vann við rannsókn á málum tengdum óþekktum fljúgandi hlutum, árum saman sagði að þessir hlutir búi yfir tækni sem sé miklu fremri þeirri tækni sem mannkynið ræður yfir. Hér sé um hluti að ræða sem geti flogið á allt að 20.000 km/klst, sjáist ekki á ratsjám og geti flogið í gegnum loft og vatn og hugsanlega úti í geimnum. Ekkert á þeim bendi til að hreyflar séu á þeim, engir vængir en samt sem áður geti þeir flogið óháð þyngdarafli jarðarinnar.
