Gareeca Gordon var nýlega dæmd í 23 og hálfs árs fangelsi fyrir að hafa myrt vinkonu sína, Phoenix Netts, í íbúð þeirra í Birmingham á Englandi í apríl á síðasta ári. Gordon stakk Netts fjórum sinnum og sagaði lík hennar síðan í sundur.

Tilviljun varð til þess að upp komst um hana mánuði síðar. Hún var þá handtekin nærri námu en þá var hún með tvær ferðatöskur meðferðis með líkamsleifum Netts í.

Gordon játaði sök. Hún hafði sent ítrekuð skilaboð til fjölskyldu Netts til að reyna að sannfæra hana um að hún væri enn á lífi og væri flutt til Lundúna. Saksóknari sagði að Netts hefði sagt vinkonu sinni í febrúar að Gordon hefði krafist þess að þær stunduðu kynlíf saman og hafi orðið illskeytt þegar Netts hafnaði því. Sky News skýrir frá þessu.

Upp komst um Gordon þegar lögreglunni var tilkynnt um bíl á ferð nærri námu í Coleford. Þegar lögreglumenn höfðu afskipti af Gordon fundu þeir tvær ferðatöskur með líkamsleifum Netts. Hún hafði reynt að brenna líkamshlutana.