Svíar hafa árum saman dregið upp þá mynd af sér sem þjóð að þar sé um hjartahlýja og vinsamlega þjóð að ræða sem taki á móti mörgum flóttamönnum. En nú verður breyting á þessari mynd Svía af sjálfum sér því ný og hörð útlendingalöggjöf er í meðferð hjá þinginu. Ef hún verður að lögum verður erfiðara fyrir flóttamenn og innflytjendur að fá dvalarleyfi í Svíþjóð en löggjöfin er í takt við löggjöf margra annarra Evrópuríkja.

Á sama tíma og margar Evrópuþjóðir reyndu að halda flóttamönnum og innflytjendum frá sér með strangri löggjöf tóku Svíar að sér hlutverk stórveldis í mannúðarmálum og tóku á móti flóttamönnum með opnum örmum. Þeir hertu að vísu útlendingalögin aðeins 2016 í kjölfar hins gríðarlega flóttamannastraums til Evrópu. Þau rök voru færð fyrir þessu að nauðsynlegt væri að herða löggjöfina þar sem önnur Evrópuríki hefðu ekki staðið undir ábyrgð sinni og tekið á móti þeim fjölda flóttamanna sem þau ættu eiginlega að taka á móti.

Samkvæmt nýju frumvarpi minnihlutastjórnar jafnaðarmanna undir forystu Stefan Löfven verða útlendingalögin nú hert til muna. Munu Svíar þar með verða á sömu línu og önnur Evrópuríki hvað varðar málefni flóttamanna og innflytjenda. Ekki er reiknað með öðru en að þingið samþykki frumvarpið sem verður væntanlega tekið til meðferðar í maí.

Samkvæmt því verður nú gerð krafa um að flóttamenn og innflytjendur læri sænsku og að þeir geti sannað að þeir geti framfleytt sér og búi yfir ákveðinni lágmarksþekkingu á sænsku samfélagi ef þeir vilja fá dvalarleyfi. Ein stærsta breytingin er að nú verða dvalarleyfi gefin út tímabundið en nú eru þau varanleg.