Gríðarlega mikil úrkoma hefur verið í New South Wales í Ástralíu að undanförnu og hefur þurft að flytja mörg þúsund manns frá heimilum sínum. Segja má að allt sé á floti víða í ríkinu og nú bætist enn ofan á hremmingarnar því yfirvöld hafa varað íbúana við áttfættum hryllingi sem er á leið inn á heimili þeirra.

Yfirvöld hafa nú sent aðvörun til íbúa á svæðinu að ný plága af verstu tegund sé jafnvel að skella á þeim. Um er að ræða eina banvænustu könguló heims, The Sydney funnel-web spider, sem mun nú væntanlega leita inn í hús fólks.

Ástæðan er að vegna mikilla flóða í og við Sydney hrekjast köngulærnar frá dvalarstöðum sínum og leita á þurrari slóðir og þar eru heimili fólks góður staður. Er fólk því hvatt til að vera á varðbergi.