Hringt var í Anders af því að hann var meðal þeirra Dana sem aðstoðuðu Ted Hui við að sleppa frá Hong Kong. Hui var þingmaður og baráttumaður fyrir lýðræði og því þyrnir í augum kínverska kommúnistaflokksins. Hann mátti ekki fara úr landi vegna yfirvofandi réttarhalda yfir honum fyrir ýmsar sakir. Hann fékk samt leyfi til að fara til Danmerkur til að taka þátt í fundum þar. En hann fór aldrei heim aftur og er nú í útlegð í Englandi.
Jótlandspósturinn fjallaði nýlega um þær afleiðingar sem flótti hans hefur haft fyrir Danina sem aðstoðuðu hann. Í þeirri umfjöllun kemur fram að kínversk yfirvöld vilji hafa hendur í hári þeirra og færa fyrir dóm í Kína. Þetta hefur eyðilagt drauma margra þeirra og sett þeim skorður hvað varðar framtíðina.
„Ef ég fer út fyrir landamæri Danmerkur þá verð ég að skipuleggja það í samráði við PET. Það eru mörg lönd sem ég get ekki farið til. Af öryggisástæðum get ég ekki skýrt frá hvaða lönd það eru en ég hefði gjarnan viljað fara til nokkurra af þeim. Ég óttast að verða framseldur til Kína frá þeim eða stungið í fangelsi,“ sagði Ander í samtali við B.T.
„Ég vissi vel að það fylgdi því áhætta að gera það sem ég gerði en þegar PET hringdi þá varð hún áþreifanleg. Ég hugsaði með mér: „Nú er þetta alvara.“ Mér brá mikið en fann til öryggis við að vita að fagfólk fylgist með mér og ég fékk á tilfinninguna að ég standi ekki einn,“ sagði Anders.
Hann sagðist ekki sjá eftir neinu. Ted Hui sé hetja sem dvelji nú í öryggi í Englandi með fjölskyldu sinni. „Það eina sem ég sé eftir er að Danmörk og Vesturlönd standa bara álengdar á meðan allt þetta gerist í Hong Kong,“ sagði hann. Þar á hann við harðar aðgerðir kínversku kommúnistastjórnarinnar og leppstjórnar hennar í Hong Kong í garð lýðræðissinna og lýðræðis.
