Í nýrri skýrslu frá Sameinuðu þjóðunum kemur fram að Erik Prince, náinn vinur Donald Trump og dyggur stuðningsmaður, hans hafi haft hönd í bagga með margskonar verkefnum í Líbíu til að styðja við hersveitir stríðsherrans Khalifa Haftar. Meðal þeirra verkefna sem hann á að hafa tengst eru sala á vopnum og öðrum hertólum fyrir milljónir dollara. Einnig átti að smygla málaliðum og búnaði til Líbíu. Málaliðarnir voru frá Bretlandi, Ástralíu og Bandaríkjunum.

Eftir því sem segir í skýrslunni þá var Prince heilinn á bak við þetta allt. Skýrslan átti að fara leynilega en The Times og The New York Times komust yfir hana og hafa fjallað um hana. Segja miðlarnir að í henni sé því lýst hvernig Prince, sem er stofnandi hins umdeilda öryggisfyrirtækis Blackwater, hafi sumarið 2019 staðið á bak við áætlun um að senda málaliða, herþyrlur og önnur hertól til Khalifa Haftar. Sex þyrlum var flogið til Líbíu frá Botsvana. Sumir af málaliðunum sigldu yfir Miðjarðarhaf en aðrir ferðuðust í gegnum Jórdaníu til Líbíu. Opinberlega áttu þeir að aðstoða við gæslu á olíu- og gasvinnslustöðum en raunverulegt verkefni þeirra var að berjast með hersveitum Haftar.

Í skýrslunni kemur fram að málaliðarnir hafi fengið það verkefni að hafa upp á og í sumum tilfellum myrða ákveðna aðila sem voru andstæðingar Haftar, þar á meðal voru ríkisborgarar ESB-ríkja.

Haftar nýtur meðal annars stuðning Rússa og Sameinuðu arabísku furstadæmanna og berst gegn stjórninni í Trípóli sem SÞ styðja. Hann er sagður hafa greitt Prince 500 milljónir dollara fyrir aðstoðina en hún átti að styðja við gott gengi hersveita hans á þessum tíma. En það gekk ekki eftir því áætlunin fór út um þúfur þegar ósætti kom upp um gæði hluta af þeim búnaði sem var innifalinn í áætluninni. Urðu málaliðarnir tuttugu því að flýja í skyndi frá Líbíu á hraðbát. Þeim var bjargað úr honum eftir 38 klukkustundir og fluttir í land á Möltu.

Tengist Trump málinu?

Málið er enn ein sönnun þess að margir brjóta vopnasölubannið sem var sett á Líbíu 2011. En það vekur einnig spurningar um þátt Donald Trump og hvort hann hafi viljað leika stærra hlutverk í stríðinu í Líbíu en legið hefur fyrir opinberlega.

Anas el-Gomati, forstjóri líbísku hugveitunnar Sadeq Institute, sagði í samtali við Al Jazeera, að með því að nota einkafyrirtæki og málaliða geti þjóðarleiðtogar blandað sér í átök á bak við tjöldin. Hann sagðist telja að þetta mál veki sérstaklega tvær spurningar: „Hversu mikla aðstoð fékk Erik Prince frá Trump við þetta? og það sem er enn mikilvægara: Samhæfði Erik Prince aðgerðirnar með rússneska Wagner-hópnum í Líbíu og aðstoðaði hann við ná fótfestu eins og hann hjálpaði Sameinuðu arabísku furstadæmunum að gera?“