Karabatic skýrir frá þessu í samtali við franska handknattleikssambandið, Fédération Francaise de Handball. Fram kemur að allt hafi gengið vel framan af og endurhæfing hafi verið við það að hefjast en þá reið áfallið yfir. „Þá fékk ég blóðtappa í lungun og endaði á sjúkrahúsi í 10 daga. Auðvitað hugsaði ég um hvenær ég gæti komist af stað á nýjan leik,“ sagði Karabatic.
Hann er enn í endurhæfingu sem felst í hlaupum utanhúss og styrktaræfingum. Hann reiknar með að geta byrjað að spila aftur á tímabilinu maí til júlí en sagðist vilja fara að öllu með gát svo meiðslin taki sig ekki upp en þau héldu honum frá því að taka þátt í úrslitakeppni HM í Egyptalandi í janúar þar sem Frakkar enduðu í fjórða sæti. Þetta var fyrsta lokakeppnin sem hann missti af síðan 2003.
