Alþjóðaheilbrigðismálastofnunin WHO telur ólíklegt að heimsfaraldri kórónuveirunnar ljúki á þessu ári. Tekist hefur að stöðva útbreiðslu hans í sumum löndum með sóttvarnaaðgerðum og bólusetningum en það er enn of snemmt að vonast til að búið verði að kveða hann alveg niður fyrir árslok.

Þetta sagði Michael Ryan, yfirmaður neyðardeildar WHO, á fréttamannafundi í gær að sögn The Guardian. Hann sagði að bólusetning viðkvæmra hópa og heilbrigðisstarfsfólk hafi í för með sér að betri stjórn hafi náðst á faraldrinum en að hann muni setja mark sitt á heimsbyggðina á næsta ári. „Það er allt of snemmt og ég tel óraunhæft að vonast til að við höfum sigrað þessa veiru í árslok,“ sagði hann.

Hann sagði að ef bólusetningar fari að hafa áhrif á dánartíðni og innlagnir á sjúkrahús og útbreiðslu veirunnar þá telji hann að heimsbyggðin muni hratt færast í átt að því að hafa fullkomna stjórn á faraldrinum.

Smitum hefur fjölgað á heimsvísu að undanförnu eftir fækkun í tæplega tvo mánuði að sögn The Guardian. WHO skiptir heiminum upp í sex svæði og á þremur þeirra hefur smitum farið fjölgandi að undanförnu, það er í Evrópu, Norður- og Suður-Ameríku, Suðaustur-asíu og Miðausturlöndum.

„Þetta eru vonbrigði en ekki óvænt,“ sagði Tedros Adhanom, aðalritari WHO.